Songez a laissez qvelqves Ecvs en qvittant table povr icelle servante.

« La dame fu et bois, qui durement plora. S'oï les leus uller et li huans hua; Il esclaaire forment et roidement tonna, Et pluet menuëment et gresille et venta. C'est hideus tans a dame qui compaignie n'a. Damedieu et ses sains doucement reclama : « Ha sire Diex! » fait elle, « voir est k'ainsi ala : De virge nasquesistes; quant l'estoile leva, Li troi roi vous requirent; jà nus hom ne sera Le jour desconseilliés qu'il les reclamera. Melcior ot non cil qui le mirre porta, Jaspar ot non li autres qui l'encens vous donna, Et Baltazar li tiers qui l'or vous presenta. Sire, vous le presistes, chascuns s'agenoilla. Si voir corn ce fu Diex ne mençonge n'i a Si garis ceste lasse qui ja se dervera. » Quant ot fait sa proiére, son mantel escourça, A Dieu s'est conmandée, aval le bois s'en va... Par le bois va la dame, qui grant paour avoit. Ce n'est pas grant merveille se li cuers li doloit, Com cèle qui ne sét quel part aler devoit. A destre et a senestre moult souvent regardoit, Et devant et derrière, et puis si s'arestoit. Quant s'estoit arestée, moult tenrement ploroit, A nus genous sus terre souvent s'agenoilloit, En crois sus l'erbe drue doucement se couchoit, La terre moult souvent piteusement baisoit. Quant s'estoit relevée, maint grant souzpir getoit, Blancheflour la roïne, sa mére, regretoit « Ha! Madame » fait èle, « se saviez orendroit A quel meschief je sui, li cuers vous partiroit ». Lors rejoingnoit ses mains et vers Dieu les tendoit « Cil Damediex », fait èle, « qui haut siét et loing voit, Parmi ceste forest hui en ce jour m'avoit, Et sa tres douce mére en tel lieu me convoit Ou mes cors a hontage mie livrez ne soit! » Lors s'assiét souz un arbre, car li cuers li failloit, Ses tres bèles mains blanches moult souvent detordoit, A Dieu et a sa mére souvent se conmandoit... Povre ostel ot la dame, quant vint a l'anuitier; N'i ot maison ne sale, ne chambre, ne solier, Ne coute ne coussin, linçueil ne oreillier, Ne dame ne pucèle, serjant ne escuier, Ne tapis estendus pour son cors aaisier... Quant la nuis fu venue, si prist a lerinoier : « Ha! nuis, conn serez longue, moult vous doi ressongnier Et quant il sera jours, si me puist Diex aidier, Ne sarai ou aler, ou avant ou arrier, Dont i a bien de quoi je me doie esniaier. De trois choses a l'une me couvient aprochier : Ou je morrai de froit, ou de fain sans targier, Ou je serai mangie ains qu'il doie esclairier; C'est povre parteüre selon mon desirier. Mére Dieu, car veuillés vostre douz Fill priier K'a ce besoing me voeille, se lui plaist, conseillier, Dame, si vraiement com j'en ai grant mestier. » Lors se met a genous, la terre va baisier : « Sains Juliens », fait èle, « veuillés moi conseillier! » Sa paternostre a dite, que n'i volt detriier, Sus son destre costé s'est alée couchier, De Dieu et de sa mére se commence à seignier, Plorant s'est endormie; Diex la gart d'encombrierl. »


Adenès, Berte aus grans piés